ਨਵੀਂ ਦਿੱਲੀ: ਦੇਸ਼ ਦੀ ਦੂਜੀ ਸਭ ਤੋਂ ਵੱਡੀ ਪ੍ਰਵੇਸ਼ ਪ੍ਰੀਖਿਆ CUET-UG (ਸੀਯੂਈਟੀ-ਯੂਜੀ) ਦੀ ਪਹਿਲੀ ਸ਼ਿਫਟ ਦੌਰਾਨ ਕਈ ਕੇਂਦਰਾਂ ‘ਤੇ ਵੱਡੀ ਲਾਪਰਵਾਹੀ ਸਾਹਮਣੇ ਆਈ ਹੈ। ਤਕਨੀਕੀ ਖ਼ਰਾਬੀ ਕਾਰਨ ਪੇਪਰ ਸਮੇਂ ਸਿਰ ਸ਼ੁਰੂ ਨਹੀਂ ਹੋ ਸਕਿਆ, ਜਿਸ ਕਾਰਨ ਦੇਸ਼ ਭਰ ਦੇ ਹਜ਼ਾਰਾਂ ਵਿਦਿਆਰਥੀਆਂ ਨੂੰ ਘੰਟਿਆਂ ਬੱਧੀ ਇੰਤਜ਼ਾਰ ਕਰਨਾ ਪਿਆ।
ਰਾਸ਼ਟਰੀ ਪ੍ਰੀਖਿਆ ਏਜੰਸੀ (NTA) ਨੇ ਦੇਰ ਸ਼ਾਮ ਸਪੱਸ਼ਟ ਕੀਤਾ ਕਿ ਤਕਨੀਕੀ ਸੇਵਾਵਾਂ ਪ੍ਰਦਾਨ ਕਰਨ ਵਾਲੀ ਕੰਪਨੀ TCS iON ਵੱਲੋਂ ਆਈ ਸਮੱਸਿਆ ਕਾਰਨ ਕੁਝ ਕੇਂਦਰਾਂ ‘ਤੇ ਪ੍ਰੀਖਿਆ ਦੇਰੀ ਨਾਲ ਸ਼ੁਰੂ ਹੋਈ। ਐਨਟੀਏ ਨੇ ਵਿਦਿਆਰਥੀਆਂ ਅਤੇ ਮਾਪਿਆਂ ਨੂੰ ਹੋਈ ਪ੍ਰੇਸ਼ਾਨੀ ਲਈ ਖੇਦ ਪ੍ਰਗਟ ਕਰਦਿਆਂ ਮੁਆਫੀ ਮੰਗੀ ਹੈ।
3,765 ਉਮੀਦਵਾਰਾਂ ਦੀ ਛੁੱਟੀ ਪ੍ਰੀਖਿਆ, ਦੁਬਾਰਾ ਹੋਵੇਗਾ ਪੇਪਰ
ਮਿਲੀ ਜਾਣਕਾਰੀ ਮੁਤਾਬਕ, ਹਾਲਾਂਕਿ 95% ਵਿਦਿਆਰਥੀ ਪ੍ਰੀਖਿਆ ਦੁਬਾਰਾ ਸ਼ੁਰੂ ਹੋਣ ਤੋਂ ਬਾਅਦ ਆਪਣਾ ਪੇਪਰ ਪੂਰਾ ਕਰ ਸਕੇ, ਪਰ 3,765 ਉਮੀਦਵਾਰ ਬਾਇਓਮੀਟ੍ਰਿਕ ਰਜਿਸਟ੍ਰੇਸ਼ਨ ਕਰਵਾਉਣ ਦੇ ਬਾਵਜੂਦ ਪ੍ਰੀਖਿਆ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਕੇਂਦਰਾਂ ਤੋਂ ਵਾਪਸ ਪਰਤ ਗਏ। ਐਨਟੀਏ ਨੇ ਐਲਾਨ ਕੀਤਾ ਹੈ ਕਿ ਇਹਨਾਂ ਪ੍ਰਭਾਵਿਤ ਵਿਦਿਆਰਥੀਆਂ ਦੀ ਪ੍ਰੀਖਿਆ ਦੁਬਾਰਾ ਕਰਵਾਈ ਜਾਵੇਗੀ। ਇਸ ਗੜਬੜੀ ਕਾਰਨ ਦੁਪਹਿਰ ਦੀ ਸ਼ਿਫਟ ਦਾ ਸਮਾਂ ਵੀ ਬਦਲਣਾ ਪਿਆ।
OSM ਟੈਂਡਰ ‘ਤੇ ਉੱਠੇ ਵੱਡੇ ਸਵਾਲ: ਨਿਯਮ ਬਦਲ ਕੇ ਕੰਪਨੀ ਨੂੰ ਪਹੁੰਚਾਇਆ ਫ਼ਾਇਦਾ?
ਸੀਬੀਐਸਈ (CBSE) 2025-26 ਬੈਚ ਦੇ ਇੱਕ ਵਿਦਿਆਰਥੀ ਸਾਰਥਕ ਸਿੱਧਾਂਤ ਨੇ ਆਨ-ਸਕ੍ਰੀਨ ਮਾਰਕਿੰਗ (OSM) ਦੇ ਤਿੰਨੋਂ ਟੈਂਡਰ ਦਸਤਾਵੇਜ਼ਾਂ ਦਾ ਵਿਸ਼ਲੇਸ਼ਣ ਕਰਕੇ ਵੱਡਾ ਦਾਅਵਾ ਕੀਤਾ ਹੈ। ਉਸ ਦਾ ਦੋਸ਼ ਹੈ ਕਿ ਯੋਗਤਾ ਅਤੇ ਤਕਨੀਕੀ ਸ਼ਰਤਾਂ ਵਿੱਚ ਬਦਲਾਅ ਕਰਕੇ ‘ਕੋਐਪਟ ਐਜੂਟੈਕ’ ਨਾਮ ਦੀ ਕੰਪਨੀ ਨੂੰ ਫਾਇਦਾ ਪਹੁੰਚਾਇਆ ਗਿਆ ਹੈ।
ਵਿਦਿਆਰਥੀ ਵੱਲੋਂ ਚੁੱਕੇ ਗਏ ਮੁੱਖ ਸਵਾਲ:
- ਬਲੈਕਲਿਸਟਡ ਕੰਪਨੀਆਂ ਨੂੰ ਰਾਹਤ: ਪਹਿਲਾਂ ਬਲੈਕਲਿਸਟ ਹੋ ਚੁੱਕੀਆਂ ਕੰਪਨੀਆਂ ਨੂੰ ਬਾਹਰ ਰੱਖਣ ਦੀ ਸ਼ਰਤ ਸੀ, ਪਰ ਬਾਅਦ ਵਿੱਚ ਇਸਨੂੰ ਸਿਰਫ਼ ‘ਮੌਜੂਦਾ ਸਮੇਂ ਵਿੱਚ ਬਲੈਕਲਿਸਟਿਡ’ ਕੰਪਨੀਆਂ ਤੱਕ ਸੀਮਤ ਕਰ ਦਿੱਤਾ ਗਿਆ।
- ਗੁਣਵੱਤਾ ਦੇ ਮਾਪਦੰਡ ਘਟਾਏ: ਸਾਫਟਵੇਅਰ ਦੀ ਗੁਣਵੱਤਾ ਲਈ CMMI ਲੈਵਲ-5 ਦੀ ਲਾਜ਼ਮੀ ਸ਼ਰਤ ਨੂੰ ਘਟਾ ਕੇ ਲੈਵਲ-3 ਕਰ ਦਿੱਤਾ ਗਿਆ।
- ਨਿਯਮਾਂ ‘ਚ ਢਿੱਲ: ਅਨੁਭਵ, ਕੁਆਲਿਟੀ ਕੰਟਰੋਲ ਅਤੇ ਜੁਰਮਾਨੇ ਦੇ ਨਿਯਮ ਬਦਲੇ ਗਏ। ਕੰਪਨੀ ਦੇ ਡੇਟਾ ਸੈਂਟਰ ਅਤੇ ਡਿਜ਼ਾਸਟਰ ਰਿਕਵਰੀ ਸੈਂਟਰ ਦੀਆਂ ਸ਼ਰਤਾਂ ਨੂੰ ਸੌਖਾ ਕੀਤਾ ਗਿਆ ਅਤੇ ਸਾਫਟਵੇਅਰ ਦੇ ਪੂਰੇ ਸੋਰਸ ਕੋਡ ‘ਤੇ ਕੰਟਰੋਲ ਵਰਗੀਆਂ ਅਹਿਮ ਤਕਨੀਕੀ ਸ਼ਰਤਾਂ ਹਟਾ ਦਿੱਤੀਆਂ ਗਈਆਂ।
ਸਿਆਸੀ ਘਮਾਸਾਨ: ਕਾਂਗਰਸ ਅਤੇ ‘ਆਪ’ ਨੇ ਘੇਰੀ ਸਰਕਾਰ
“ਜਲਦੀ ਕਿਉਂ… ਸ਼ਰਤਾਂ ਕਿਉਂ ਬਦਲੀਆਂ?” — ਜੈਰਾਮ ਰਮੇਸ਼ (ਮਹਾਸਕੱਤਰ, ਕਾਂਗਰਸ) “ਸੀਬੀਐਸਈ ਨੇ ਬੋਰਡ ਪ੍ਰੀਖਿਆ ਤੋਂ 74 ਦਿਨ ਪਹਿਲਾਂ OSM ਲਾਗੂ ਕਰਨ ਦੀ ਇੰਨੀ ਕਾਹਲੀ ਕਿਉਂ ਕੀਤੀ? ਡਰਾਈ ਰਨ (Dry Run) ਵਿੱਚ ਸਾਹਮਣੇ ਆਈਆਂ 36 ਖਾਮੀਆਂ ਨੂੰ ਕਿਉਂ ਨਹੀਂ ਸੁਧਾਰਿਆ ਗਿਆ? ਕੀ ਸ਼ਰਤਾਂ ਬਦਲ ਕੇ ਕਿਸੇ ਖ਼ਾਸ ਕੰਪਨੀ ਨੂੰ ਫਾਇਦਾ ਪਹੁੰਚਾਇਆ ਗਿਆ ਹੈ? ਇਸ ਦੀ ਸੁਤੰਤਰ ਜਾਂਚ ਹੋਣੀ ਚਾਹੀਦੀ ਹੈ।”
“ਮਾਫੀਆ ਦੇ ਚੁੰਗਲ ਵਿੱਚ ਸਿੱਖਿਆ” — ਅਰਵਿੰਦ ਕੇਜਰੀਵਾਲ (ਆਪ) “NEET ਪ੍ਰੀਖਿਆ ਵਿੱਚ ਪੇਪਰ ਲੀਕ ਰੋਕਣ ਲਈ ਹਵਾਈ ਸੈਨਾ ਦੇ ਜਹਾਜ਼ਾਂ ਦੀ ਵਰਤੋਂ ਕੀਤੀ ਜਾਵੇਗੀ। ਕੀ ਇਸ ਨਾਲ ਪੇਪਰ ਲੀਕ ਰੁਕ ਜਾਵੇਗਾ? ਸਰਕਾਰ ਦੀ ਨੀਅਤ ਹੀ ਪੇਪਰ ਲੀਕ ਰੋਕਣ ਦੀ ਨਹੀਂ ਹੈ। ਦੇਸ਼ ਦੀ ਸਿੱਖਿਆ ਵਿਵਸਥਾ ਪੂਰੀ ਤਰ੍ਹਾਂ ਮਾਫੀਆ ਦੇ ਚੁੰਗਲ ਵਿੱਚ ਫਸ ਚੁੱਕੀ ਹੈ।”
CUET-UG ਪ੍ਰੀਖਿਆ ਸਾਲ 2022 ਵਿੱਚ ਸ਼ੁਰੂ ਹੋਣ ਤੋਂ ਬਾਅਦ ਹੀ ਕਈ ਵਾਰ ਤਕਨੀਕੀ ਅਤੇ ਪ੍ਰਬੰਧਕੀ ਕਾਰਨਾਂ ਕਰਕੇ ਵਿਵਾਦਾਂ ਵਿੱਚ ਰਹੀ ਹੈ। ਕੇਂਦਰ ਬਦਲਣ, ਸਰਵਰ ਫੇਲ ਹੋਣ ਅਤੇ ਪ੍ਰੀਖਿਆਵਾਂ ਰੱਦ ਹੋਣ ਵਰਗੀਆਂ ਘਟਨਾਵਾਂ ਪਹਿਲਾਂ ਵੀ ਸਾਹਮਣੇ ਆ ਚੁੱਕੀਆਂ ਹਨ।
CUETUG #CUETExam #NTA #EducationSystem #ExamScam #CBSE #TCSiON