ਪੁਣੇ: ਮਸ਼ਹੂਰ ਰੈਪਰ ਹਨੀ ਸਿੰਘ ਇੱਕ ਵਾਰ ਫਿਰ ਵਿਵਾਦਾਂ ਵਿੱਚ ਘਿਰ ਗਏ ਹਨ। ਪੁਣੇ ਵਿੱਚ ਹੋਣ ਵਾਲੇ ਉਹਨਾਂ ਦੇ ਆਉਣ ਵਾਲੇ ਕੰਸਰਟ ਤੋਂ ਪਹਿਲਾਂ ਜ਼ਿਲ੍ਹਾ ਬਾਲ ਸੁਰੱਖਿਆ ਅਧਿਕਾਰੀ (DCPO) ਨੇ ਸਖ਼ਤ ਰੁਖ਼ ਅਖਤਿਆਰ ਕਰਦਿਆਂ ਪੁਲਿਸ ਕਮਿਸ਼ਨਰ ਨੂੰ ਨੋਟਿਸ ਜਾਰੀ ਕੀਤਾ ਹੈ। ਇਸ ਨੋਟਿਸ ਰਾਹੀਂ ਹਨੀ ਸਿੰਘ ਨੂੰ 4 ਅਪ੍ਰੈਲ 2026 ਨੂੰ ਮਹਾਲਕਸ਼ਮੀ ਲਾਨਜ਼ ਵਿਖੇ ਹੋਣ ਵਾਲੇ ਪ੍ਰੋਗਰਾਮ ਵਿੱਚ ਅਸ਼ਲੀਲਤਾ, ਨਸ਼ੇ ਅਤੇ ਗਨ ਕਲਚਰ ਨੂੰ ਉਤਸ਼ਾਹਿਤ ਕਰਨ ਵਾਲੇ ਗੀਤ ਗਾਉਣ ਤੋਂ ਵਰਜਿਆ ਗਿਆ ਹੈ।
ਡਾ. ਪੰਡਿਤਰਾਓ ਧਰੇਣਵਰ ਦੀ ਸ਼ਿਕਾਇਤ ‘ਤੇ ਕਾਰਵਾਈ
ਇਹ ਕਾਰਵਾਈ ਚੰਡੀਗੜ੍ਹ ਦੇ ਐਸੋਸੀਏਟ ਪ੍ਰੋਫੈਸਰ ਡਾ. ਪੰਡਿਤਰਾਓ ਧਰੇਣਵਰ ਵੱਲੋਂ ਦਿੱਤੀ ਗਈ ਸ਼ਿਕਾਇਤ ਦੇ ਆਧਾਰ ‘ਤੇ ਕੀਤੀ ਗਈ ਹੈ। ਡਾ. ਪੰਡਿਤਰਾਓ ਲੰਬੇ ਸਮੇਂ ਤੋਂ ਗਾਇਕਾਂ ਵੱਲੋਂ ਪਰੋਸੀ ਜਾ ਰਹੀ ਅਸ਼ਲੀਲਤਾ ਅਤੇ ਗਨ ਕਲਚਰ ਵਿਰੁੱਧ ਮੁਹਿੰਮ ਚਲਾ ਰਹੇ ਹਨ। ਉਹਨਾਂ ਦੀ ਸ਼ਿਕਾਇਤ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਡੀਸੀਪੀਓ ਨੇ ਪੁਲਿਸ ਨੂੰ ਹੁਕਮ ਦਿੱਤੇ ਹਨ ਕਿ ਬੱਚਿਆਂ ਦੀ ਮਾਨਸਿਕ ਸਿਹਤ ਨੂੰ ਮੁੱਖ ਰੱਖਦਿਆਂ ਅਜਿਹੇ ਗੀਤਾਂ ‘ਤੇ ਪਾਬੰਦੀ ਲਗਾਈ ਜਾਵੇ।
ਇਨ੍ਹਾਂ ਮਸ਼ਹੂਰ ਗੀਤਾਂ ‘ਤੇ ਲੱਗੀ ਰੋਕ
ਨੋਟਿਸ ਵਿੱਚ ਹਨੀ ਸਿੰਘ ਦੇ ਕਈ ਸੁਪਰਹਿੱਟ ਗੀਤਾਂ ਨੂੰ ਸਟੇਜ ‘ਤੇ ਗਾਉਣ ਦੀ ਸਪਸ਼ਟ ਮਨਾਹੀ ਕੀਤੀ ਗਈ ਹੈ:
- ਨਸ਼ਿਆਂ ਨਾਲ ਸਬੰਧਤ: “ਚਾਰ ਬੋਤਲ ਵੋਡਕਾ”, “ਵਨ ਬੋਤਲ ਡਾਊਨ”, “ਮਨਾਲੀ ਟ੍ਰਾਂਸ”।
- ਅਸ਼ਲੀਲਤਾ ਅਤੇ ਗਨ ਕਲਚਰ: “ਦਿਸ ਪਾਰਟੀ ਗੈਟਿੰਗ ਹਾਟ”, “ਮਖਨਾ” ਅਤੇ “ਗੋਲੀਆਂ”।
- ਤੰਬਾਕੂ ਪ੍ਰਮੋਸ਼ਨ: “ਮਿਲੀਅਨੇਅਰ” ਗੀਤ ‘ਤੇ ਵੀ ਰੋਕ ਲਗਾਈ ਗਈ ਹੈ ਕਿਉਂਕਿ ਇਹ “ਸਪੇਨ ਫੈਟ ਸਿਗਾਰ” (ਤੰਬਾਕੂ ਉਤਪਾਦ) ਨੂੰ ਪ੍ਰਮੋਟ ਕਰਦਾ ਹੈ।
ਅਦਾਲਤ ਦੇ ਹੁਕਮਾਂ ਦਾ ਹਵਾਲਾ: ਨੋਟਿਸ ਵਿੱਚ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਦੇ 2019 ਦੇ ਉਸ ਫੈਸਲੇ (ਪੰਡਿਤਰਾਓ ਧਰੇਣਾਵਰ ਵਿ. ਪੰਜਾਬ ਸਰਕਾਰ) ਦਾ ਜ਼ਿਕਰ ਕੀਤਾ ਗਿਆ ਹੈ, ਜਿਸ ਵਿੱਚ ਲਾਈਵ ਸ਼ੋਅ ਦੌਰਾਨ ਅਜਿਹੇ ਗੀਤਾਂ ‘ਤੇ ਪਾਬੰਦੀ ਲਗਾਈ ਗਈ ਸੀ।
ਸਖ਼ਤ ਚੇਤਾਵਨੀ: ਪ੍ਰੋਗਰਾਮ ਹੋ ਸਕਦਾ ਹੈ ਬੰਦ
ਸ਼ਿਕਾਇਤਕਰਤਾ ਨੇ ਇਹ ਵੀ ਮੰਗ ਕੀਤੀ ਹੈ ਕਿ ਸਟੇਜ ‘ਤੇ ਕਾਰ ਦੇ ਇਸਤੇਮਾਲ ਨੂੰ ਰੋਕਿਆ ਜਾਵੇ। ਨੋਟਿਸ ਵਿੱਚ ਸਾਫ਼ ਕਿਹਾ ਗਿਆ ਹੈ ਕਿ ਜੇਕਰ ਹਨੀ ਸਿੰਘ ਨੇ ਨਿਯਮਾਂ ਦੀ ਉਲੰਘਣਾ ਕੀਤੀ ਜਾਂ ਸਟੇਜ ‘ਤੇ ਗ਼ਲਤ ਭਾਸ਼ਾ ਦੀ ਵਰਤੋਂ ਕੀਤੀ, ਤਾਂ ਪੁਲਿਸ ਪ੍ਰੋਗਰਾਮ ਨੂੰ ਵਿਚਾਲੇ ਹੀ ਰੋਕ ਸਕਦੀ ਹੈ।
ਇਸ ਨੋਟਿਸ ਤੋਂ ਬਾਅਦ ਹੁਣ ਪ੍ਰਬੰਧਕਾਂ ਅਤੇ ਹਨੀ ਸਿੰਘ ਦੇ ਪ੍ਰਸ਼ੰਸਕਾਂ ਵਿੱਚ ਹਲਚਲ ਤੇਜ਼ ਹੋ ਗਈ ਹੈ। ਦੇਖਣਾ ਹੋਵੇਗਾ ਕਿ 4 ਅਪ੍ਰੈਲ ਨੂੰ ਹੋਣ ਵਾਲੇ ਇਸ ਸ਼ੋਅ ਵਿੱਚ ਹਨੀ ਸਿੰਘ ਕਿਹੜਾ ਰੁਖ਼ ਅਪਣਾਉਂਦੇ ਹਨ।
- #GunCulture #DrugPromotion #SocialAwareness #NoObscenity #PunjabiMusic #MusicIndustry #TobaccoBan #ManaliTrance #MillionaireSong